Kesempwalpen Seri kan me kin Tungoale Dihdi rehn Nohno Kan

Mie lapalahn wekpeseng nanpwungen seri kan me tungole pilen dihdi en nohno kan oh me sohte tungoale. Pilen dihdi en nohno kan kin ienenen sewese kehlail mehn podondor en soumwahu kan nan paliweren seri kan. E wia mehn sawas en dore soumwahu tohto, oh ni ansouohte e sohte kin pweipweida, e pil karehiong seri kan en tungoalenki koaiok en madamadau ni arail pahn kekeirda.

Pilen dihdi en nohno kan pil kin apwaliala mehn koroson tohto me seri kan kin patowen anahne. Irail kin tungoalenki roson mwahu oh sohte kin nohn dor mehlel ni ansou me re kin iangada dihen soumwahu kan.

Kadehdehpen mehn koroson mwahu me pato nan pilen dihdi en nohno kan pil sansalehr sang nan repoht lahud en palien Medical Association nan America me seri me tungoale pilen dihdi en nohno kan tungoalenki lolokong de marain en madamadau sang seri kan me sohte kin tungoale. Met sang ni docosohexanoic acid (DHA) oh arachidonic acid (AA) me pato nan pilen dihdi en nohno kan. Ih met me eledahr DHA eh pil dolohier nan milik pehs en nan sdowah kan me serih kan pil kin tungoale nan dihdi pwotol akan.

E inenenen kesemwpwal en kin wia mehn ketemen me pilen dihdi en nohno kan kin wiawihda sang nan mehn koroson mwahu en nohno kan sang ni nohno kan arail pahn kin anahne pwersek oh kalapw kadihdi seri kan nan ansou kan me konehng. Ni serih kan arail pahn kehlail en tungoale dihdi en nohno kan a ihme wiahda pilen dihdi lauhd en nohno kan.

Ma serih kan sohte kalapw tungoale pilen dihdi en nohno kan a met elehiong pilen dihdi en nohno kan e sohte pahn lauhd. Ma nohno men tungoalenki seri imwpwer ehu oh ira koaros tungoale pilen dihdi en nohnohu, a udahn ara tungoal milik de pilen dihdi en nohnohu udahn pahn lauhd oh kak apwalih ira. Mie sawehweh ehu me pato rehn mehn Pohnpei me dene nohno men me neitik pwelel, e kin anahne mwenge lauhd pwe en kak mie pilen eh tungoal dihdi kan. Oh e pil pahn kin anahne tungoal ni pwong de mwengehn pwong pwe en pil mie pilen dihdi kan. Ahpw mehlel, seri kan me konehng tungoale pilen dihdi en nohno kan pwe iei ihme pahn kalauhdehla pilen dihdi en nohno kan, a kaidehn "mwengehn pwong de ienpwong".

Kesemwpwal nohno kan en kin tungoalenki insenamwahu oh sohte tungoalenki pwunod. Pwehki insensuwed oh pwunod kak katokehdi arail tungoal pilen dihdi kan. Lih emen de nohno men anahne en tungoalenki kopworopwor de lamalam kehlail ehu me e kak kadihdi eh tungoal seri de serih kan.

Nohno kan me kin patowen kadihdi arail tungoal seri kan pil kin kak tihtihla mwurin arail pahn kin liseian oh pil sewese perehsang irail soumwahu kanser en dihdi, kanser en poason oh paiking en nan wasahn kainen pihl en lih akan.

World Alliance for Breastfeeding Action (WABA) me pil iangahki United Nations Children's Fund oh World Health Organization patowen ehupenehr nan dooadoak kesemwpwal oh kaweidki me nohno men de nohno kan en patowen kadihdi arail tungoal dihdi kan serih kan ni arail patowen ipwidi oh lel sounpwong weneu. Sohte ehusoang en iang patehng pilen dihdi en nohno kan me pahn wehwehki udahn pihl oh sohte lipilipil songen pihl teikan nan erein sounpwong weneu wet. Serih kan en pil tungoale pilen dihdi en nohno kan lel sounpar riau de daulih.

Kaping doke La Leche League sang ni arail tungoal pwuhk en repoht ehu me oralap ketihtihki "Breastfeeding Makes a Different" ohng ni doadaok en wiawihdahn repoht wet. Ma mie sapwelimomwi kalelapak, a komwi kak ketido de patohdo oh tuhwong Ms. Berno Hedson nan imwen wini en Pohnpei.